Monday, January 28, 2019

看亞洲杯2019有感 

本屆賽事所用的8個球場有2個場地在家附即使是其他場地車程只不過是2個小時。直到目前為止在現場觀看了以下比賽:

分組賽:
中國對吉爾吉斯
中國對菲律賓
北韓對卡塔爾
阿聯酋對泰國
越南對也門
日本對烏茲別克

16強
中國對泰國
澳洲對烏茲別克

8強
阿聯酋對澳洲

4強
伊朗對日本 (今晚的比賽,已買票)

如有機會買到決賽門票,當然會抽空去看呢,將來不可能抽空去某亞洲國家看亞洲杯吧。所以,此次大賽是唯一一次機會。不過,若東道主阿聯酋殺進決賽,應沒機會得到門票。

現場比賽,主要是看比賽氣氛與球迷的熱情程度。有友人說,不喜歡現場看球賽,看得不清楚,沒有慢鏡,球迷太嘈。各人有各人的喜好,我著實不評論。如果要求慢境,看得清楚,安靜,倒不如留在家中看電視吧?跟看演唱會一樣,若要求表演者演出完美,看得清楚,或唱得跟MP3一樣,倒不如留在家中看DVD或聽MP3?

當中一些趣事值得記下:

(1) 北韓與卡塔爾這場比賽,出現經典一幕,除了數十個金正恩派出的美女加油團,全場都是空空如也!兩隊比賽,像是踢練習賽,完全沒有亞洲杯這大型賽事的氣氛。球員踢得好也沒有掌聲支持鼓勵。北韓的球迷當然不會到此地看比賽了,而卡塔爾因為政治問題,專程到此看比賽的人什少。

阿聯酋與沙地連成一線,在政治與經濟上孤立卡塔爾,純粹一個政治問題,與體育無關,但傳媒都選擇避風頭,有關卡塔爾的報導很少,卡塔爾陣型十分低調,很少球員接受訪問,政治話題完全避開,就這樣,低調地殺進四強了。

(2) 雖然卡塔爾政治上給東道主孤立,但電視所見,8強淘汰韓國時,本地阿聯酋工作人員很高興上前跟卡塔爾球員握手以示支持,令我感到兩國間純是政治問題,阿聯酋人與卡塔爾人,人與人間其實沒有芥蒂與心病,大家似終是同文同種,一直稱兄道弟的阿拉伯人。

(3) 今屆越南的實力大增,令人眼前一亮,數年前大概只是跟港隊水平差不多,連續十年不停燒錢搞青訓後,成果漸現,現在或不久的將來,越南與香港足球水平的距離愈拉愈遠。現時的越南肯定比國足的水平更高。

(4) 從前已有現場看比賽的經驗,但只限於球會間的比賽,觀看大型國家比賽如亞洲杯,著實是有生以來第一次。國家比賽跟球會比賽不同,其中一個環節是播放雙方國歌。四周看看球迷或中立觀眾,聽到現奏XX的國歌,現場所有人循例全體起立,即使是敵方球迷都會起立安靜以示基本尊重,政治上對立的國家,如沙地對卡塔爾的賽事,我沒看到噓對方國歌的低劣行徑出現。奇在數年前的中港大戰,有不少香港球迷噓國歌,自以為有趣,基本體育精神與尊重欠奉,當時港足受亞洲足協嚴厲警告其實亞洲足協不用先警告,應直接處罰港足,取消港足主場出賽的權利,以示事件的嚴重性。

(5) 阿聯酋政府近年有意討好中國,加強經濟上合作,拉近雙方距離,16強淘汰泰國後,所有當值工作人員在出口處列隊歡呼,慶祝國足晉級,似是大會精心安排。此現象似是只有國足晉級的比賽才會出現,這也是相當有趣的場面。



15 comments:

  1. 國足的不爭氣,沒有人會寄以厚望吧。

    ReplyDelete
    Replies
    1. 國足十年後都追唔到亞洲一線, 遑論打世界賽的球隊

      Delete
  2. 慶幸西亞國家看來沒有全面參與美國的包圍網, 就算西方國家全面圍堵, 至少在中東還有這塊市場

    我也有一個很喜歡進場睇波噓國歌的親戚, 他今年應該有六七十歲了, 據他本人說法, 國歌是被"賊人"塞到我們香港裏的, 對他而言, 每次聽國歌都像被強姦一樣難受, 昭雪仇恨乃大事大非的重要事, 即使損害港隊利益也要做, 反正次次都踢到pat屎咁

    ReplyDelete
    Replies
    1. 我覺得西亞人都是看利益為主, 似終經濟上靠向陸地, 一定有著數.

      如果一把年紀, 做人做到咁都好辛苦. 噓完, 事實都是一樣, 地球一樣照轉. 我自己是比較集中做一些自己有能力去改變的東西, 而不是做一些沒意思的事.

      Delete
  3. “阿聯酋政府近年有意討好中國“

    是否因阿聯酋與老美在石油供應上有衝突,所以才刻意討好老美的敵人?😂 敵人的敵人是朋友呢~

    ReplyDelete
    Replies
    1. 整個阿拉伯世界都比老美玩左好耐, 但需要美軍守護, 敢怒不敢言, 睇錢, 將來都係要靠攏大陸穩陣.

      Delete
  4. 國足..恨鐵不成鋼呀。。。

    ReplyDelete
    Replies
    1. 十年內肯定追不上日本南韓.

      二,三十或有機會

      Delete
  5. 簡單寫兩句先。

    睇今晚伊朗個阿茲蒙對日本踢到發脾氣,再睇對國足時如入無人之境迫得幾個後衛連番出醜,就知道國足同亞洲一流的距離了。

    睇日本踢波真係好舒服,個16號中堅波到人到出腳有爽快,阿茲蒙都無符

    ReplyDelete
    Replies
    1. yes. 日本不得不欣賞, 組織, 整體踢法, 仲有身位, 個人技術,

      在歐洲球會踢開幾年係唔同d. 日本全team在歐洲踢, 回到亞洲真係高一班. 不過, Iran呢場竟然出現低級錯誤, 出錯後, 跟著愈來愈亂.

      如果Iran正常發揮, 兩方實力差距沒這樣大. 5-5波吧.

      日本大搞J-league, 運動商業化, 再大搞青訓, 前後需時30-40年才有今天成績, 大批年輕球員在歐洲各地踢波, 整個系統現在不停產出新人, 現在內地連系統都未開始建, 真係要搞好管治水平, 青訓系統, league等, 起碼20-30年吧. 到時有幸成功, 我都已是老鬼不可能再進場支持了, 哈.

      Delete
    2. //有友人說,不喜歡現場看球賽,「看得不清楚,沒有慢鏡,球迷太嘈。」

      不是的,現場睇先會有“上帝視覺”,更會體會到頂級球員/球隊的威力和整體性。記得好多年前現場睇歐聯拜仁對AC,只要睇到無球在腳的前鋒跑一個靚位,下一刻就立即會出現有威脅攻勢。

      //今屆越南的實力大增
      //連續十年不停燒錢搞青訓後,成果漸現

      從八強對日本的表現,越南已經有亞洲二線準一線的水平;當然一場半場難以完全定論,但由十年前的亞洲四線升格到亞洲二線肯定走唔甩。

      據報導越南是07年開始大搞青訓的,其中與阿仙奴合作最緊密;亞洲杯之前最大成果當然是年初的亞洲U23錦標賽亞軍。

      //北韓與卡塔爾
      //數年前大概只是跟港隊水平差不多
      //越南與香港足球水平的距離愈拉愈遠
      //即使損害港隊利益也要做, 反正次次都踢到pat屎咁

      幾年前香港對越南已經係下風波,而家大家真係唔同level了。

      值得留意是今屆北韓勁差,門前猶如無掩雞籠,踢法非常落後,光靠體能已經毫無作為,可見閉門造車的劣勢;而香港呢幾年開始同北韓“拉近距離”,好多場波都只是僅敗或打和(雖然仍未打破唔知幾多十年無贏過北韓的紀錄),卻間接反映出港隊的表現只是對方大幅退步的結果。

      一直好多人無提的是,香港噓國歌的情況只集中於足球賽事,可見足球真的是體育中“和平時代的戰爭”,友blog的魔術師將港隊“美名”為“龍獅軍”真係貼切非常。

      //國足的不爭氣,沒有人會寄以厚望吧
      //國足十年後都追唔到亞洲一線, 遑論打世界賽的球隊

      中國足球最大的問題,遠因是90年代職業化後,青訓由以前專業體制(即是體工大隊模式)漸漸交俾市場經濟,但市場卻長時間建立唔到新的青訓模式;再加上02至10年間假賭黑充斥青訓完全荒廢,造成90後一代人才嚴重斷層。以前專業體制雖然不能同國際接軌,但勉強出到幾個成功留洋的球員,例如范志毅孫繼海等,而舊體制兼放過洋的最後一代鄭智,到而家38歲高齡仲要撐住看見一班。國足已經是今屆平均年齡最大的球隊,保得住八強已經對得太公婆住,未來幾年不限齡賽事(例如世預賽)可能會仲差,大家真係要有心理準備。畢竟體育運動都係童子功,足球員在15歲前基本已經定咗人生上限,無論中超搞到幾火爆請幾多星級外援,始終對成年段球員提升唔到幾多的。

      至於比較遠既未來,國內好多人話02後一代已經大幅好轉,05後甚至比拼日韓同齡人,這得益於近年中超熱潮同開始大幅投入青訓...問題是而家好似上面話一定要22年入世界杯,唔知體育總局會搞啲咩搞彎個氣氛。總之未來幾年要睇實幾個亞洲限齡賽例如U19同U16,再來評價國足長遠水平不遲。

      如果青訓勢頭不斷,我覺得國足十年後就算上唔到亞洲一線,都起碼去返90年代至千禧年間的準一線地位。

      //日本大搞J-league, 運動商業化, 再大搞青訓, 前後需時30-40年才有今天成績, 大批年輕球員在歐洲各地踢波

      日本個酒井宏樹,13年踢柏雷素爾同廣州恆大踢亞冠,俾張琳芃(即是國足5號,對泰國攞黃牌對伊朗時停賽)爆到阿媽都唔認得...後來酒井硬著頭皮去咗德甲,張5繼續留係中超,人生的分野就是這樣定下的。

      對菲律賓入咗兩球靚波既武磊,而家加盟西甲愛斯賓奴,不論是否商業因素都好,都希望佢可以成為新一代標杆.




      今晚卡塔爾大炒東道主,狀態fit到爆,加埋22年舉辦世界杯,黃袍加身正是時候...小弟8強未踢時已經想買卡塔爾冠軍,當時有成15倍,點知唔記得買,贏咗南韓後跌到得返4.5倍...不過我都意思下買返...50咁多,睇下眼光準唔準啦。

      Delete
    3. 我現場睇完卡塔爾後, 已經感到佢地有機會去決賽了. 呢team人大多數都係上年U23骨幹成員, 仲有幾年時間進步呢. 呢幾個年青主力都係時候去歐洲踢下再上一層樓了.

      UAE VS QATAR呢場, 一定比亞洲足協算帳, 客軍次次進球, 當地球迷不停將膠樽或鞋擲向客軍球員, 再加上開波前兩天, 本地其中一個王子買起晒成個球場既門票, (原因係佢唔想有客方球迷去球場支持客隊, 成年事都係政治野, UAE前幾場比賽都冇本地王子做過呢樣野)再派比本地球迷, 應該係嚴重違反FIFA既規例. (規例列明球場內某一個比例既門票要賣比客方球迷)

      點講都好, 呢場決賽, 本地人肯定唔會睇, 咁日本球迷人數有限, 買門票就好easy了. 隨時得50%入座率.

      講番大陸, 90年代係冇晒人踢, 唯有寄望於2000後, 或2005後, (2000後都接近20歲, 應該過晒最值得訓練既時期), 2030年, 呢一班球員都有機會出番鄭智或老孫呢個level,踢到英超既球員既. 到時應該可以比較接近日韓既level. 但要做到現時日本咁百花盛放, 成team人有成30個係歐洲球會搵食, 需要再多一些時間呢.

      Delete
  6. 原來張5曾經咁勁, 真係唔知.

    ReplyDelete
  7. 果然!

    Joseph兄應該會再發文講多次亞洲盃,到時再吹埋佢(雖然我今晚無睇...)

    ReplyDelete
    Replies
    1. 哈, 不會單為一場決賽發文了, 我現在出文次數很少了, 很懶。

      Delete